د (ابراهیم صافي د چرګانو فارم) د لغمان او ننګرهار ولایتونو په بېلا بېلو ولسوالیو کې د تېرو شپږو کالونو راهیسې د چرګپالنې په برخه کې فعالیت کوي.
ددغه شرکت رئیس ابراهیم صافي نومیږي او د ننګرهار ولایت د چرګانو د خرڅلاو په مارکیټ کې د غوښینو چرګانو د خرڅلاو څانګه هم لري، د هغه په وینا، دخپل شرکت د پرمختګ او ودې لپاره له ګڼو اقتصادي او تخنیکي ستونزو سره مخ ؤ او د نوموړي شرکت د ودې لپاره هم کومه بله زمینه نه وه برابره.
خو کله چې نوموړی د کرنیزې پرمختیا صندوق د مالي تمویل تر پوښښ لاندې راغی، ډېر خوښ دی او وایې: کله چې مونږ د کرنیزې پرمختیا صندوق دفتر له اغیزمنو مالي تمویلاتو په هکله خبر ترلاسه کړ، نو سمدستي مو د مالي تمویل ترلاسه کولو لپاره د ننګرهار ولایت په جلال آباد ښار کې د یاد دفتر له کوچني مالي تمویل آفیسر سره مجلس وکړ، او د تمویل د بهیر په هکله د مالوماتو ترلاسه کولو وروسته مو د مالي تمویل لپاره یاد دفتر ته غوښتنلیک وړاندې کړ، د کرنیزې پرمختیا صندوق اړتیا ته په کتو، نه یوازې دا چې زموږ مالي ملاتړ یې وکړ، بلکې مونږ ته یې د صندوق اړوند د ختیځ زون تخنیکي مسووُل له لاري د فني پوهې د زدکړې (سیمینارونو) زمینه هم برابره کړه، چې د کرنیزې پرمختیا صندوق دغه اقدام زموږ د کوچني کاروبار لپاره خورا ګټور او د یو ستر بدلون سبب وګرځید او دغه پریګړه زموږ شرکت لپاره د یو ښه بدلون راوړونکي سفر پیل وُ. چې دا په کوچنیو اقتصادي فعالیتونو باندې د کوچنیو مالي تمویلاتو د ښه وو اغېزو ښکارندویې کوي.
نوموړی بیاځلې د صندوق له خوا د آسانتیاوو له چمتو کولو څخه د خوښۍ په څرګندولو سره زیاتوي: د لومړی مرستې غوښتنې پر مهال زموږ د فارمونو له ډلې، یو فارم چې د ۹ زرو غوښینو چرګانو روزنه پکې ترسره کېدله فعال ؤ او درې نور فارمونه یې د مالي سرچینو د نه شتون له امله نه وو فعال. خو له نېکه مرغه اوس د صندوق د کوچنی مالي تمویل د ترلاس کولو څخه وروسته مونږ و توانیدو، چې خپل دریې نور فارمونه هم فعاله کړو، چې دې سره د ابراهیم صافی د چرګانو فارم د کارمندانو په شمېر کې هم زیاتوالی راغی او ۶ تنه نور مسلکي کارمندان په دنده وګمارل شول او د غوښینو چرګانو په تولیداتو کې هم د پام وړ بدلون رامنځته شو، چې دې سره د شرکت تولیدات د ۹ زره څخه ۲۱ زره چرګانو ته ورسېده، چې دا به د هیواد په ختیځ زون کې د غوښینو چرګانو لپاره د هیوادوالو د غوښتني په پوره کولو کې مهم رول ولوبوي.
د غه پرمختګونه یوازی د کمیت له پلوه نه دي، بلکي د صندوق د فني لارښود له لارې، د فارم زیربناوې هم عصری شوي دې، چې پکې د فارمونو د کارمندانو په مهارتونو کې، همدارنګه کارمندانو په یونیفورم، د چرګانو د ساتني په ځایونو کې خورا مهم بدلونه رامنځته شو، چې د یاد بدلونو اغیزه نه یوازې زموږ، بلکي زمونږ کورنۍ او ټولنې ته هم الهام ورکړی، چې د کرنې او مالدارۍ چوپړونو کې د نور اغیزمنو فرصتونو په لټه کې واوسي، چې په دې توګه به د هیواد اقتصادي ودې، پرمختګ او ځان بسیاینې سره مرسته وکړي.
نوموړي له صندوق او د ختیځ زون کارکوونکو د کار او ښه چلند څخه د خوښۍ څرګندولو په ترڅ کې وایې: موږ د کرنیزې پرمختیا صندوق له مشرتابه څخه او ددغه صندوق د ختیځ زون فني ټیمونو څخه ډیر منندوی یو، چې د هغوی ثابت ملاتړ، نه یوازې د کوچني مالي تمویل په برخه کې، بلکې په تخنیکي برخه کې هم زمونږ خوب په رښتیا بدل کړ، د هغوی مسلکي چلند، پر وخت اړیکه، او هڅونې مونږ ته دا الهام راوبخښه، چې خپلو لوړو موخو ته ځان ورسوو او د د غوښینو چرګانو په سکټور کې د خپلو چوپړونو په وړاندې کولو کې لا پراختیا راولو او دا چاره لا ګړندۍ کړو.
د ابراهیم صافی د چرګانو فارم اوس مهال د دې شاهد دی، چې څرنګه ټاکلی ملاتړ او همکاري کولی شي ژوندون بدل، ټولنې پیاوړې او محلي اقتصاد ته وده وړکړې.